تكلم دلوقتي عن الشخصية وطرق التعامل و ازاى تبقي جذااااااااااابة
عارفة لو طلعتي تجري وقلتي لالالالا انا عايزة حاجات لبشرتي وشكلي هجيبك من شعرك
نتكلم بالراحة انا بحب أجيب تجارب شخصية ف كلامي
**************
مشهد رقم 1
واحدة اعرفها اسمها (ن) البنت دي بسم الله ما شاء الله الله اكبر يعني تقول
للقمر قوووووم وانا اعد مكانك ... الكللللللللل بلا استثناء مش بيحب يتكلم
معاها !!!! طب ليه كده ؟؟؟؟ انا مش بحب اتكلم على حد والله انا بس بديكوا
مثال عام ...
روحها تقيلة كده !!!
عارفين انتوا البنات اللى لما تيجي تكلميهم تلاقيهم ضاربين البوز اياه 7 متر قدام و يردوا عليكي ببروووووووووود كده
و اللى هي تحسسك انك اقل منها ف كل حاجة مع انك احسن منها بكتير
والله فاكرة انها ملكة جمال الكون وان جمالها مديها الحق انها تتصرف وحش
**************
اهه انا بقولك كده عشان تعرفي ان جمال شكلك مش كفاية
احنا اتفقنا فى الاول خالص ان الجمال بينقسم لجمال شكل وجمال روح وشخصية
50% لكل واحدة
ويمكن كمان جمال الشخصية ياخد 60%
يعني ايه واحدة شخصيتها جميلة ؟؟؟؟؟؟؟
الشخصية دي عبارة عن كذا حاجة
الشخصية = تفكير + اراء + سلوك + طريقة تعامل مع الاخرين
دلوقتي احنا عايزين ايه ؟؟؟
انا عن نفسي أحب انى اسيب اثر ف اى حد اتعامل معاه
و احب انه ياخد عني انطباع كويس جدا جدا
دي حاجة مش بتنازل عنها
بصوا انا مبحبش اجيب كلام من برة منقول
واكتر مواضيع بكرهها هي اللى بتبدأ ب ( يجب عليك ان ) اول ما اشوف الفصيح ده بحس بحاجة غريبة متفهموش ليه
الكلام كله من تجارب شخصية
********************
أولا : العيون
عينيكي الفاااااتنة دي اللى علشانها الشاعر قال
حوراء ان نظرت اليك .... سقتك بالعينين خمرا
جامد ها
العيون مهمة جدا ف طريقة تعاملك مع الناس
اكترررررررررررر حاجة بكرهها ف حيااااااااااااتي اني ابقى بكلم حد وده باصص ف حتة تانية غير عينيا
بحس ان كلامي مش مهم وانه مش مركز معايا نهائي
رقم 1 ف كلامك مع الناس ( بصي للناس ف عيونهم ماتبصيش فوق وتحت ) نظرتك لحد ف عينيه وهو بيكلمك بتحسسه انك مهتمة بكلامه ومركزة معاه
حتى لو انتى مش مهتمة بالكلام انتى بنوتة محترمة وذوووووووووق لازم تبيني الاهتمام عشان الشخص ده ماينفرش منك
انا تلقائيا والله بنجذب للناس اللى بتبص ف عينيا وانا بكملها ... يعني
واحدة صاحبتي لما بحكيلها على حاجة بلاقيها بصالي و مركزة ف كلامي ده الصح
لكن بقى لما الاقي واحدة كده بتبص الناحية التانية كل شوية بحس ان الموضوع فيه عدم احترام ليا وعدم اهتمام بكلامي
********************
ثانيا الرد
بعد ما اهتميتي بكلام اللى بيتكلم معاكي ردي بطريقة ظريفة لبقة كده
اه وعشان خاطري بطلوا طريقة الصراحة الوقحة
يعني ايه ؟؟؟
يعني عندي برضه واحدة صاحبتي لما اي واحدة تقولها مشكلة تلاقي دي بترد
عليها : ماهو بصراحة انتى اللى بتستهبلي اوي وغلطانة و جاية بعد كده تقولي
انصحوني
اووووووووف بجد ايه ده؟؟؟؟؟؟
ولما نقولها بالراحة شوية تقول يعني أكدب عليكوا؟؟؟
لأ مش كدب قولي رأيك بس بطريقة كويسة وبلاش كلام مش ظريف تحت مسمى الصراحة
لو أى حد بيحكيلك مشكلة طلعي منها جانب ايجابي بأأأأأأأأأأأأأي طريقة
دوري على أى حاجة ايجابية وطلعيها ووري اللى قدامك ان مشكلته ابسط مما يتخيل وان هو مزعل نفسه زيادة عن اللزوم
لو عندك عتاب ليه قوليه عادي بس بالراحة شوية
يعني لو صاحبتك غلطانة مثلا قوليلها : بصي يا جميل متزعليش مني احنا زي
الاخوات ... انتى غلطانة فى النقطة دي كان المفروض تعملي كذا كذا كذا
الخلاصة : ردك لازم يبقى لذيذ وظريف ويريح اللى قدامك مش يتعبه اكتر وصلي كل اللى عايزة تقوليه حتى لو عتاب ولوم بس بطريقة كويسة
***************
ثالثا : المجاملة
بصي يا جميل المجاملة دي لذيذة جدااااااااا وبتفتحلك قلوب ناس كتير
مش قصدي انك تكدبي لأ المجاملة ف الكلام العادي مش بتبقى كدب
مثلا مثلا : اول ما تشوفي حماتك قوليلها كلمة رقيقة كده وعاكسيها بالكلام
قوليلها ايييييييه يا طنط الحلاوة دي بس ده اللى يشوفك يقول اختي الصغيرة
واغمزيلها كده و بوسيها
مامتك كل يوم الصبح قوليلها يا صباح العسل على احلى ام فى الدنيا
واحدة صاحبتك طلبت منك طلب قوليلها ده انتى تؤمري يا جميل
جوزك عايز حاجة قوليلي كلامك أوااامر يا باشا
لو شفتي مامت صاحبتك قوليلها لالالالالالا انا كده هتلغبط يا طنط ده انتى يبان عليكي اختها الصغيرة
كدددددددده يعني اتصرفي خلي الناس تحب ردك وتحب تشوفك مش يبقى كلامك تقيل كده والناس تكره تقف معاكي
***************
رابعا : الادب
كلمة حضرتك دي خليها على لسانك على طول قدام الناس الغريبة وخصوصا اللى
أكبر منك لاااااااااازم الاحترام والادب فى الكلام معاه وده مع أى حد
يعني مثلا هتسألي حد فى الشارع عن طريق قوليله : بعد اذنك
ولو اكبر منك بكتير يبقى بعد اذن حضرتك
استخدمي الكلام الجميل ده زي ( حضرتك و بعد اذنك ولو سمحت و اتفضل ووووو ) كل الالفاظ المؤدبة دي
اى حد بتتعاملي معاه بذوق واحترام هيتعامل معاكي باحترام غصبا عنه
يا جماعة الادب ده اكتر حاجة بتكسب الواحد احترام الناس والناس كلها بتحب تتعامل مع الانسان المؤدب مش الانسان السخيف قليل الادب
*********************
خامسا الصوت
ابووووووس ايدك بلاش الصوت الجهووووري ده
اكتر بنات بكرههم ف حياتي اللى الاقي صوتهم عالي و ضحكتهم جايبة اخر الشارع بجد بجد صعبة اووووووووووووي دي
خليكي انثى رقيقة كده صوتك على قدك انتى مش بتذيعي نشرة على الملأ اتكلمي بالراحة خالص و بهدوووووووووووووووء بلاش عصبية
( نصيحة عالماشي : لو صوتك خشن وعايزاه يبقى أنعم شوية كلي سكر نبات كتير بجد بينعم الصوت اوي (
***************
سادسا ابداء التعليق
لو عجبك لبس صاحبتك قوليلها كده ماتخبيش
مثلا لو لابسة بنطلون شيك ( قوليلها ما شاء الله زوقك حلو اوى )
ولو مثلا صاحبتك ف يوم كانت جاية احلى من المعتاد قوليلها اييييييييه يا عم القمر ده انتى هتقطعي علينا ولا ايه
كددددددددده يعني خليكي مرحة وخفيفة و لذيذة
*******************
سابعا بلاااااااااااش فتي
لو في حاجة متعرفيهاش قولي معرفش بلاش فتي نهااااااااائي عشان نهايته مش كويسة صدقيني
*************
ثامنا : سيبي الناس تتكلم عن نفسها
بصوا يا بنات احنا كبشر كلنا بالفطرة بنحب نتكلم عن نفسنا
يعني مثلا لو قلتي لحد انك بتلعبي كرة طائرة لازم يرد عليكي يقولك رأيه ( هو ) فيها و ايه الالعاب اللى ( هو لعبها )
يعني لازم كل واحد يتكلم عن نفسه ف اى موقف
اسمعي النااااااس وبلاش تقاطعيهم لو حد بيحكيلك عن موقف معين حصله بلاش
تقاطعيه وهو بيتكلم سيبيه يستمتع بلذة الكلام عن نفسه وردي عليه لما يخلص
كلامه
بجد الناس بتحب تتكلم عن نفسها جدا وبترتاح اوى مع الناس اللى بتسيبها تتكلم براحتها
**************************************************
تاسعا : ساعدي الناس الكبيرة
ساعدي الناس اللى محتاجة ولو واحدة كبيرة فى الشارع وقع منها حاجة مثلا مش عيب انتى توطي وتجيبيها لو هي ست عجوزة بالعكس ده اسمه ذوق
لو واقفة على الاسانسير مثلا وواحدة برضه كبيرة شايلة اكياس وطالعة اعرضي عليها انك تساعديها وتشيلي معاها لغاية الباب
*****************
عاشرا والاهممممممممممم
انتوا عارفني بحب اجيب اهم حاجة فى الاخر
الابتساااااااااااااااااااااااااااامة
عشااااااااااااان خاطري بلاش التكشيرة اياها بتاعت البياعات اللى فى المحلات
سبحان الله بجد تلت تربع بياعات المحلات عليهم بوز يطفش بلد و تعامل سخيف معرفش ليه !!!!!
اضحككككككككي يابنتي خلي على وشك ابتسامة الناس تفتكرك بيها بلاش على طول
تبقي مكشرة كده وتقيلة ودمك تقيل لأ خلي ابسامتك على وشك على طول
الناس لاشعوريا كده بتحب المبتسمييييييييييييييييييين
********************
الخلاصة من الكلام ده كله خلي روحك حلوة و عندك سرعة بديهة و قولي لناس
كلام رقيق زيك بلاش كلام سخيف او وقح او يجرحهم بأي شكل من الاشكال خلي
الناس بمجرد تعامل واحد معاكي تقول البنت دي مؤدبة اوى وذوق ما شاء الله
***********
ولسه الدرس ده ليه تكملة
موضوع: جمالك فى شخصيتك...الدرس الخامس 
الجمعة سبتمبر 16, 2011 4:20 pm