صباح الفل على احلى برينسيسات فى الدنياااااااااااا كلها
********************
النهاردة هنتكلم عن الاقتصاد
اتخضيتوا ها ؟؟؟
أكيد لأ هنتكلم عن حاجة تانية
درس النهاردة ممل بس لذيذ ماتفهميش ازاى
الدرس عن الثقة بالنفس ^^
سؤااااااال بقى
انتى واثقة ف نفسك؟؟؟؟
من حيث كل حاجة يعني واثقة ف شكلك واثقة ف اسلوبك واثقة ف قدرتك انك تحققي اللى انتى عايزاه ؟؟؟؟
الاجابة فى الغالب هتكون ( عادي مش اوى )
بالرااااااااااحة خالص بقى
نتكلم الاول عن الثقة فى الشكل
عارفة انى اتكلمت عنه ف اول درس
بس نتكلم تانى
ثقتك ف شكلك بتأثر على نسبة كبييييييييييييييييرة من تصرفاتك
بصي من الاخر كده انا عايزاكي تبقي ماشية بتقولي يا ارض انهدي ما عليكي قدي
مش قصدي غرور طبعا
لاااااااااا خالص
بس عايزة ثقتك عالية اووووووووووووووووووووووووووووووووى
ولما تشوفي واحدة حلوة جداااااااااااااا ابتسمي جواكي واعرفي انك احلى منها
خلي عندك يقين ان جمالك مش عند حد تاني
انتى مميزة .... عينيكي مش عند حد شفايفك مش عند حد رمووووووووووشك مش عند حد
بصي اكيد انتى عرفتي ف حياتك واحدة موزة موزة موزة يعني صح ولا لأ ؟؟؟
افتكررررررري تصرفاتها كده
مش تحسي انها بتبقى هي المسيطرة عادة لو ف شلة بين صحباتها؟؟
بتحسي ان هي دي اللى بتتسمع وهي دي اللى دمها خفيف و هي اللى اسعد من غيرها
ده كلام نسبي طبعا يختلف من حد للتاني
بس المهم انها بتبقى مهمة اكتر من غيرها
الجمال بيدي صلاحيات كتير انا عارفة
بس في حاجة لو صدقتيها هتغير حياتك كلها حالا
*************
نتبدي الأول بمثال صغير
زمان كان عندي واحدة صاحبتي كانت ولا امورة اوى ولا وحشة اوي
بس كانت شايفة نفسها انها اوحش واحدة فينا مع انها كانت ملامحها مريحة يعني
بس كانت مثلا تحاول تغير تسريحة شعرها او شكل لبسها او او او عشان تبقى حلوة
مرة كانت نازلة معانا و كانت احلى من العادة كانت عاملة شعرها بطريقة لايقة عليها اوي
فواحدة مننا قالتلها ما شاء الله احلويتي ... قامت واحدة تانية قالتلها ااااه بجد انتى امورة اوى النهاردة
سبحااااااااااااان الله البنت سلوكها اتقلب 180 درجة !!! ... كانت تمشي معانا كده ساكتة مش بتتكلم كتير
لقيت دي فجأة بقت مبتسمة و عمالة تهرج وتضحك و مبسوووووطة كده لغاية باقى اليوم كله
لدرجة ان والله معظمنا قال انه حبها اكتر كده لما بدأت تتكلم معانا كتير و
تحكي حاجات و تهرررررج و تألش مع انها زمان ماكنتش كده خالص
!!!!
**********************
بصوا يا جماعة مش هنضحك على بعض
جمال البنت بيديها ثقة فى النفس غير عادية لدرجة ان تصرفاتها بتبقى بطريقة معينة
اهه المثال اللى انا اديتهولكوا ده دليل كبير على كده
احنا بقى حبينا البنت اكتر وبقت جذابة بالنسبة لينا ليه ؟؟؟؟
لأنها بدأت تغير سلوكها المنطوي وبقت متكلة مبتسسسسسسسمة مبسوطة بتضحك بتحكيلنا على حاجات بتعمل بتعمل بتعمل
كللللللللللل ده لمجرد اننا قلنالها انها امورة !!!
يعني احنا ماحسينهاش جذابة أكتر لانها بقت أحلى
لكن لأن أسلوبها بقى اسلوب أحسن بكتير و وغيرت عادتها الانطوائية والكئيبة دي
****************
مثال بقى العككككككككككس
واحدة صاحبتنا معروف انها امورة جدا بسم الله ما شاء الله
و على طووووول بقى هي القائدة بتاعت الشلة وهي اللى كله بيبصلها وهي اللى كله بيضحك على خفة دمها
ف يوم نازلين فواحدة بتقولها : (ن) لفة الطرحة دي مش حلوة عليكي اردعي للأولانية احسن
يا خبر ابيييييييييييييض لقتلك دي اتقلبت فجأة قالتها ايه ده بجد ؟؟؟؟؟
.... و بقت باقي اليوم ماشية مكسوفة جدا وفجأة قالتلنا انا عايزة اروح عشان
تعبانة !!!!!
البنت يمكن ردة فعلها مبالغ فيها
بس مجرد انها اتعودت تكون احلى واحدة ولما حست للحظة ان شكلها اقل من المعتاد نفسيتها اتغيرت و طريقتها اتغيرت
*****************
انا برغي كل ده ليه ؟؟؟؟؟؟؟؟؟؟
عشان افهمك ان الناس بتحس انك جميلة لما انتى الاول تقتنعي بالموضوع ده
لكن طول ما انتى بتقولي ... انا سمرا يبقى انا وحشة
انا شعري خشن يبقى انا وحشة
انا طويلة اوووووى يبقى انا وحشة
انا قصيرة اووووى يبقى انا وحشة
انا رفيعة اوى انا تخينة اوى انا انا انا انا انا
لما تحسي ان حاجة مضيقاكي ف جسمك او شكلك و قابلة للتغيير غيريها
يعني لو تخينة وده مقلل ثقتك ف نفسك يبقى ابدأ غيري الموضوع ده حااااالا ابدأي خسي وخلي عندك عزيمة واصرار انك هتتغيري
ولو رفيعة روحي لدكتور و خدي فواتح شهية واعملي الله تقدري عليه
لو شعرك حاساه مش حلو زيدي اهتمامك بيه
لو لفة الطرحة حساها مش حلوة عليكي غييييييييري فيها و جربي كتير لغاية ما توصلي للي عايزاه
اهتمي ببشرتك اوى و بجسمك ولو شايفة انك شكلا مش حلوة يبقى لازم تغيري نظرتك لنفسك عشان الناس تغير نظرتها ليكي
وعلى فكرة انتى ممكن تكوني جميلة جدا بس تصرفاتك بتغطي على جمالك وبتخلي
الناس تشوفك اقل من جمالك والعكس صحيح ممكن تكوني مش جميلة اوى شكلا بس من
كتر ما انتى حبوبة كده ونضييييييفة وبنت ناس وزي العسسسسسسل والله العظيم
ماحد هيفكر انك وحشة كل الناس هتبقى معجبة بيكي جدا جدا جدا
****************
في بنات بتضايق عشان مش بتتعاكس
مممممممممممممممممممم
على فكرة ده احساس عادي جدا !!!! ومش هنضحك على بعض تلت تربع البنات بتحب تتعاكس
مش المعاكسة الحقيرة اقصد المعاكسة بتاعت : هو القمر بيطلع الصبح ولا
اييييييييييييه ... واييييييه العسل ده ... و يخرب بيت جمااااااااالك
البنت مش بتحب الكلام ده عشان قليلة الادب
بس مجرد ان هو ده الكلام اللى بيزود ثقتها ف نفسها جدااااااااااااا
وبتحس انها جمييييييييييييييييييييييييييلة و محدش قدها
وده بيترتب عليها سعادتها الداااااخلية وكلنا بندور على السعادة صح ولا اييييييه؟؟؟
طب بذمتك انتى مستنية ولد يقولك انك جميلة عشان تصدقي الموضوع ده !!!!!!!!!
ماهو مش هينفع يا جماعة الواحدة تهد ثقتها ف نفسها لمجرد ان عمرها ما
بتتعاكس فى الشارع والله عيييييييييييييييييب
زمااااان اوي بقيت واحدة صاحبتي بتقولي ان ثقتها صفر و انها حاسة انها اوحش
بنت فى الدنيا ... ليييييه يابنتي ... تقولي محدش فى الشارع بيبصلي ولا
عمري اتعاكست امال هتجوز ازاااااااااااى
ياااادي النيلة بجد
يا جماعة انسوا الكلام ده خالص ومحدش يحطوا ف دماغه نهائي
مانتى ممكن تتعاكسي 70 مرة كل يوم وتبقي بااااااااااردة كده وسخيفة وماحدش يطيق يقف معاكي
ده مش مقياس اطلااقاااااااااااااااااااا
*******************
الخلاصة : الجمال = نظافة + روح خفيفة + ابتسامة دائمة + ثقة بالنفس عالييييييييييييييييية + لسان حلو + اهتمااااام بالنفس + ثقافة
بس كده
يعني لما تهتمي بالحاجات دي الناس غصبا عنها هتشوفك جميلة جدا جدا جدا
********************
خلصناااااااا من الثقة بالشكل
والله اللى ماهتثق ف شكلها بعد كل اللى انا قلته ده يومها اسود
موضوع: ثقتك فى شكلك وسيلتك لقلب الكل 
السبت سبتمبر 17, 2011 7:03 pm